E ardhmja e Cristiano Ronaldos nuk pritet të jetë te Manchester United, pasi ai nuk po pëlqehet nga trajneri i ri Erik Ten Hag.
Trajneri i ri i Djajve të Kuq nuk e sheh Ronaldon në projektin e tij me klubin anglez dhe këtë tanimë ia ka bërë të qartë portugezit.
37-vjeçari ka edhe një vit kontratë me Djajtë e Kuq, por kjo kontratë mund të zgjidhet me marrëveshje mes palëve.
Mediat portugeze dhe ato italiane kanë raportuar se Ronaldo ka dy opsione para vetës sa i përket kampionateve evropiane.
Ish-skuadra e tij Sportingu i Lisbonës, por edhe gjiganti italian Roma janë dy skuadrat favorite për të nënshkruar me Ronaldon.
Agjenti i Ronaldos, Jorge Mendes tanimë ka pasur bisedat e para me Jose Mourinhon dhe drejtorin sportiv të Romës, Tiago Pinton.
Ronaldo fiton një pagë të lartë dhe Roma është gati t’i ofrojë atij 24 milionë euro në sezon, para që shumicën nga to do t’i dhurojnë disa sponsorë.
Jose Mourinho e ka mirëpritur idenë që të punojë përsëri me Ronaldon, derisa portugezi aty do të gjente edhe shokun e ekipit kombëtar, portierin Rui Patricio.
Nga ana tjetër Ronaldo e pëlqen edhe një rikthim te Sportingu i Lisbonës në Portugali, por problemi qëndron se kjo skuadër nuk mund t’i ofrojë as 10 milionë euro në stinorë legjendës portugeze.
Qëllimi i pesë herë fituesit të Topit të Artë është të qëndrojë edhe për dy vite në Evropë para se të transferohet në SHBA.
Gjithsesi largimi i tij nga United po shihet si i sigurt, por mbetet të shihet se ku do të transferohet legjenda portugeze.
