Neymar është i vetëdijshëm se qëndrimit të tij te Paris Saint-Germaini mund t’i ketë ardhur fundit.
Lajmi i raportuar nga RMC është konfirmuar nga gazeta spanjolle, El Pais, të cilët iu janë referuar burimeve të afërta me presidentin e klubit, Nasser Al-Khelaifi.
Patroni i PSG-së dëshiron të imponojë më shumë disiplinë në skuadër me Kylian Mbappen që do ta udhëheqë strukturën e re.
Anësori francez thuhet ta ketë veçuar brazilianin për mungesë disipline në stërvitje dhe në periudhat pas ndeshjeve.
Ndryshimi te kampioni francez filloi pikërisht me rinovimin e Mbappe deri në vitin 2025 dhe vazhdoi me largimin e drejtorit sportiv, Leonardo dhe zëvendësimin e tij me Luis Campos.
I përballur me mundësinë e largimit, përfaqësues të PSG-së u takuan me babanë e Neymarit dhe i garantuan se do t’ia jepnin pagesat që do t’i detyroheshin.
Sipas El Pais, klubi i detyrohet deri në 200 milionë euro brazilianit sipas kontratës, prandaj është i gatshëm që t’ia japë pagën e plotë edhe te klubi i tij i ardhshëm (gjë që do të realizohej përmes fondacionit të tij në Brazili, Instituto Neymar Jr.).
Burimet e PSG-së thonë se Luis Campos do të jetë njeriu prapa transferimit të Neymar, i cili nuk është i kënaqur me këtë trajtim dhe ndihet i përulur.
30-vjeçari nuk është stërvitur si duhet në sezonet e fundit dhe ka luajtur me tre apo katër kilogramë të tepërt, megjithatë ai është angazhuar më së shumti nga sulmuesit e skuadrës gjatë ndeshjeve.
Braziliani është i vetëdijshëm që në edicionin e kaluar nuk kishte qenë në formë të mirë dhe madje e kishte menduar largimin e tij qëkur PSG u eliminua nga Real Madridi në Ligën e Kampionëve
