“Historia ime filloi rreth 15 vjet më parë në Bregun e Fildishtë. Që atëherë kam luajtur për shumë ekipe… por historia ime nuk ka përfunduar ende. Tani fillon një kapitull i ri”, ishin fjalët e para të Wilfried Bony në ditën që nënshkroi për NEC Nijmegen të Eredivisie.
‘Historia’ e tij, siç thotë ai, nuk ka qenë e lehtë vitin e fundit. Bony, i cili u bë afrikani më i shtrenjtë në histori kur nënshkroi për Manchester Cityn për 32 milionë euro në vitin 2015, kishte mbetur pa ekip që nga largimi nga Al Ittihad në vitin 2020.
Ndeshja e tij e fundit ishte më 9 shtator 2020, apo 505 ditë më parë!
Që atëherë, sipas ‘BBC’, sulmuesi 33-vjeçar nga Bregu i Fildishtë ishte duke u stërvitur me Newport County, në divizionin e katërt anglez.
“Pas përfundimit të kontratës sime në Arabinë Saudite, nuk isha ende gati të ndaloja së luajturi futboll. Do të bëj çmos që të fitoj formë sa më shpejt që të jetë e mundur, në mënyrë që të jem i rëndësishëm për ekipin”, ka thënë ish-sulmuesi i Swansea, Manchester City dhe Stoke.
Bony kthehet aty ku ishte ‘golashënuesi më i mirë’ në sezonin 2012-13 me 31 gola, kur luante te Vitesse, rivalin e ‘përjetshëm’ i NEC Nijmegen.
“Kam kaluar një kohë të mirë këtu dhe jam shumë i lumtur që kam mundësinë të luaj në Eredivisie. Jam i vetëdijshëm se kjo është një lëvizje e ndjeshme për disa tifozë, por shpresoj të kem një shans të drejtë për t’u paraqitur në mënyrë pozitive për tifozët tanë” , ka thënë Bony.
