Bayern Munich është ndalur për herë të parë këtë edicion në elitën e futbollit gjerman Bundesliga.
Kampioni në fuqi i Gjermanisë ishte nikoqir i Borussia Moenchegladbach dhe ka barazuar me rezultat 1-1.
Bavarezët e nisën më mirë ndeshjen, kur në minutën e 34-të shënoi Sadio Mane, por që goli u anulua për pozitë jashtë loje.
Nëntë minuta më vonë mysafirët gjetën golin, kur sulmuesi francez Marcus Thuram realizoi për 0-1.
Me epërsinë minimale të mysafirëve përfunduan 45 minutat e para në këtë ndeshje.
Rekordmenët e Gjermanisë ishin më kërkues në pjesën e dytë duke sulmuar vazhdimisht, por vetëm në minutën e 83-të e gjetën golin e barazimit.
Ishte sulmuesi gjerman Leroy Sane që shënoi një gol të bukur pas asistimit nga Jamal Musiala për rezultatin përfundimtar 1-1.
Kjo ishte ndalesa e parë e Bayernit në Bundesliga pas tri fitoreve radhazi, teksa e sheh vetën në krye të tabelës me 10 pikë sa ka edhe Union Berlin.
Ndërkohë mysafirët nga Gladbach mbesin në vendin e gjashtë me tetë pikë.
Në xhiron e ardhshme Bayerni do të udhëtoj drejt kryeqytetit gjerman për tu përballur me Union Berlinin, derisa Gladbach pret Mainzin.
